Arsenal Ṭantuten Vanduaina Tawk Hruaizela Ralna Nei

Nimin Dt 27,6,2020 (Inrinni) khan mizo Arsenal ṭantute chuan Samtlang tlangval vanduaina tawka boral ta Hruaizela ralna an nei.

“Vawiin khân kan Zoram chhung leh pâwna Arsenal ṭantuten Samtlang tlangval quarry chima boral ta Tv. Hruaizela râlna atana sum kan thawhkhawm chu a hlanna neih a ni.

Tv. Hruaizela râlna hi anmahni in ngêiah, Samtlangah neih niin Tv. Robert L. Tlau (Robs Tlau) chuan râlna inkhawm a kaihruai a, Tv. Lalnunfela Hlawndo (Lalnun Fela Hlawndo) in hunserh hmangin Dr. Melody Lalṭanpuii (Melody Goonerette) chuan râlna thilpek hlanna a nei a, Tv. Hruaizela chhungte hnên aṭangin thusawi tawi ngaihthlak a ni bawk.

Râlna thilpek Rs. 80,000/- chu Tv. Hruaizela chhungte hnenah hlan a ni a, hemi bâkah hian Tv. Hruaizela’n a boral san a chhungte buaipuia thawk hah êm êm Samtlang YMA hnenah Rs. 2,500/- hlan a ni bawk a ni.

Arsenal ṭantute aiawhin Samtlangah hian khaw chhe tak hnuaiah mi 9 lai an kal thei a, anni inpêkna azarah Arsenal ṭantute kan mawi leh e.

A pawimawhber erawh hetianga midangte tâna luangchhuak thei tura engkim kan ruahmannate min tih hlawhtlinsaktu Pathian a ni a. A dawtah mi inphal tak tak, midangte tâna malsawmna ni a sum thawhtute in ni.

Neih bik vâng pawh ni lo, midangte tâna luanchhuah hrim hrim duha mahni kova tla ang maia ngaia midangte tâna in inpekna leh in inphalnate hi Pathianin mal a sawm ngêi ang tih hi kan beisei a, kan ring tlat bawk a ni.

Kan hmaah engnge lo thleng zel dawn kan hre lova, hun lo kal lehzel turah pawh engpawh ti dawn ila Zoram dung leh vâng leh ram pawna awm Arsenal ṭantu zawng zawngte chu ‘Unau kan ni alawm’ tiin lungrual takin kal zel tum ila, Arsenal ṭantute kan ‘sipisial’ bikna hi i târlang zel teh ang u”

Be the first to comment

Leave a Reply

Your email address will not be published.


*